Showing posts with label කවි වගේ කවි. Show all posts
Showing posts with label කවි වගේ කවි. Show all posts

Saturday, December 20, 2014

රාත්‍රිය හරි දිගුයි..........



උදා හිරු රැස් හෙමිං
කොහේ සැඟවුණිද දැං
රාත්‍රිය හරි දිගුයි
ගෙවෙන්නෙම නැති හැඩයි

මේ විසල් කතරබිම
හිඳිමි මං මග බලං
දින දසුනෙ පිටු අතර
නැවත එන දිනය තෙක්

නාස් පුඩු ඉව කරයි
ඔබෙ සුවඳ රැඳුණු තැන්
නිදන්නට බැරි හැඩයි
දෙනෙත් මගෙ හරි බරයි

                                                               රුක්ෂිලා වෙත්තමුණි

Monday, October 6, 2014

උරුමය........


.
.
.

  හිරු ගියත් අවරටම
  සඳ නැගෙයි එළිය දී
  නුඹ ගියත් දුර ඈත 
  ඔබේ සිහින මටම දී 


   - රුක්ෂිලා වෙත්තමුණි -   

Tuesday, August 19, 2014

ආවර්ජනය



එළිය ඇති
හැම මොහොතකම
අඳුරෙ
ගුලිවෙන්න
හීන දකින
අතීතය



                    රුක්ෂිලා වෙත්තමුණි


සිතුවම - මොටාගෙදර වනිගරත්න (අන්තර්ජාලයෙනි)

Thursday, August 7, 2014

ආදරය.........

සඳට පෙම් බැන්දාට
හිරු තරහ වුණේ නෑ
තරු එළියට ලෝබ වී
අයිතිකර ගත්තෙ නෑ

රිදීවන් රේඛාව අහස් කුස සිඹිනවිට
මේඝ දූතයන්විත් ගෝරනාඩු කෙරුවාට
කළුවර දෙනෙත් හිමි නිශා කුමරී ළඟට
දිව ගිහින් හිමි සඳුනි ඔබේ රැස් දුන්නාට

සඳ එළිය රෑ පුරා විහිදුවා හතිලන්න
අඳුර ඇති හැම තැනම එළිය පතුරාලන්න
සොමි ගුණය උතුරුවා හදින් හද සනසන්න
ඔබ නොවෙද හිමි මගේ  සදා ළංවී සිටින

                                     රුක්ෂිලා වෙත්තමුණි



සිතුවම - ජයසිරි සේමගේ (අන්තර්ජාලයෙනි)

Tuesday, June 3, 2014

සිහින.............





එන්නකෝ එන්නකෝ 
මා වැළඳ ගන්නකෝ
සාදරයෙන් පිළිගනිමි
හනි හනික එන්නකෝ
නින්දෙන් මා වෙළා
තදින් බැඳ ගන්නකෝ
සොඳුරු වූ සිහිනයන්
අනේ පෙන්වන්නකෝ
සැබෑ වූ ලොවෙහිදී
ලබාගත නොහැකි දේ
සිහිනෙන්වත් ඇවිත්
මට හනික දෙන්නකෝ


- රුක්ෂිලා වෙත්තමුණි -


**සිහින ගැන කලකට ඉහතදී පළ කළ ලිපියක්. කියවන්න බැරිවෙච්ච අය පහත ලින්ක් එකෙන් කියවන්න

Tuesday, May 13, 2014

කිරි කඳුළු.......


වියළි තන පුඩු
උරා හඬනා
පුතුගෙ කඳුළින්
ඇකය පිරුණා

හෙළන කඳුළැලි
මහ ගඟක් වී
සයුර සිඹිමින් 
ගලා හැලුණා

කඳුළු පොකුරක් 
සිප්පි කටුවක
සැඟවිලාවිත්
ගොඩට ඇදුණා

යෝධ පයකට 
තැලී පොඩිවුණ
කඳුළු පොකුරම
හඬා වැටුණා



                                                                  රුක්ෂිලා වෙත්තමුණි

Tuesday, February 26, 2013

අම්මා



අපරිමිත සෙනෙහසින්
වෙළී ඔබ තුරුල්ලේ
කිරි උරා බිවු දෙතන
දැනෙයි උණුසුම තවම


හෝඩියේ ඇති අකුරු
එකිනෙකට ගලපමින්
කෙලෙස මම ගොතන්නද
ඔබේ ගුණ කව් පබැඳ
පතමි මම නිවන් සුව

මගේ ආදර මව්නි......!!

Thursday, December 6, 2012

මවු නැති දා

හ්ම් මලේ සුවඳ
මේක මගෙ අම්මාට
අම්මගෙ සුවඳ
මේ වගේම වෙන්න ඇති

කඩා ගත්තාට වැඩක් නැහැනෙ
මගෙ ආදරෙත් එක්ක
මේ මල පරවෙනවනෙ
හරියට මගෙ ජීවිතය වගෙ

අනෙ මගෙ අම්මේ
ලෝකයේ කොහේ හරි ඉදලා
මගෙ තුරුලට එන්න
අම්මගෙ උණුසුම මොන වගෙද කියලා
මට කියන්න තේරෙන්නෙ නැහැ

ඉඩෝරය




තෙතමනයක් නැති 
   හදකින්
ආදරය පැතීම
වලාකුළක් නැති
   අහසින්
වැස්ස ඉල්ලීමකි

Friday, August 10, 2012

අරගලය

 
වැරෙන් හති හලමින්
දෙපයට ගොදුරු වූ
බයිසිකල් පැඩලය
වේගයෙන් කැරකෙත්ම
ජීවන අරගලයේ රෝදය
හදවතේ ලබ් ඩබ් ශබ්දය පරයා
සීරුවෙන් ඉරිදියට ඇදෙන සඳ.....

සරුව පිත්තල සංගීත රාවය
පරිසරයේ නිහඬ බව බිඳගෙන
ඔච්චම් කරමින් මා පසුකරත්ම
කෙළි පොඩිත්තිගේ කුස ගින්දරින්
මගේ මුළු සර්වාංගයම
දැවී අළු විය මොහොතකට..............



 (බුද්ධදාස ගලප්පත්ති සොයුරාගේ
"හෙට නැවත එයි" පොතේ
'දවසක් නිමාවෙයි' කතාවට ලියවුණු මගේ හදට දැනුණු සිතුවිල්ල...............)







Wednesday, August 1, 2012

බහරේන් සිට.....

අලුයම හතරටයි ඉර මල පිපෙන්නේ
සැවුල් නාදෙ නැත සවනත වැකෙන්නේ
ගහ කොළ නොවෙයි බිල්ඩින්මයි පෙනෙන්නේ
රෑන් පිටින් විහඟුන් නැත දකින්නේ

ගිනියම් සුළඟවිත් සිරුරම දවන්නේ
දූවිලි පිරුණු කණ අහසයි පෙනෙන්නේ
නිල්වන් ගුවන කවදා නම් දකින්නේ
නිරන්තරෙන් නෙත් දෙක මගෙ තෙමෙන්නේ

පිනි බිඳු පිරුණු තණ පලසක් කොයින්දෝ
මලින් වැසුණු ගස් වැල් මෙහෙ කොයින්දෝ
ලේන ගිරා මුව මී මැසි කොයින්දෝ
මහකතරක වැව් අමුණක් කොයින්දෝ

මුහුද ගොඩ දමා බිල්ඩින් තැනෙන්නේ
රට ඉඳි ගස්ය තැන තැන නෙත ගැටෙන්නේ
මා පිය නෑසියන්ගෙන් දුර වෙසෙන්නේ
කවදා කොහොම යළි ගම රට දකින්නේ

Saturday, March 10, 2012

දරා ගැනීම

ඉරිතලා මියැදෙමින්
පණ අදින බිමි කඩට
අහම්බෙන් වට වැස්ස
උහුලන්ට හැකි වේදෝ......





අලුත් වැස්සක්

පාලු කතරක අතරමංවී
හුදකලාවක රජයමින් සිත
අයාලේ යන මාරුතය ඉම
ගෙවූ කාලය නිමා වූ වග
කෑ ගසා මම කියමි ලොවටම

මාගේ ප්‍රාණේ ජීවයයි නුඹ
ආදරේ උණුහුමින් සතපන
හුදකලාවක සුසුම් අතරින
මගේ හදවත අරක් ගත් ඔබ
වැළඳ ගමි මම සදා බැතියෙන

අලුත් වැස්සක් වැටී හිනැහෙන
නැවුම් සුවඳක් තිලිණ කර දෙන
පිපි දිදුලන කුසුම් පෙති මත
ඔබේ සෙනෙහස දැනේ තව තව
සදාතනිකව රැඳෙමි ඔබ ළඟ.......